ياما فالجراب يا مصر

قال المطرب الشعبي شعبان عبد الرحيم إنه لا يبالي بأية انتقادات توجه إليه، أو اتهامات بـ "النفاق"، بعد أغنيته التي أهداها إلى الرئيس مبارك بمناسبة احتفاله بعيد ميلاده التاسع والسبعين.
ولم يخف في حوار مع "المصريون"، إعجابه الشديد بالرئيس مبارك، بعد أن وصفه بأنه "ابن بلد وجدع" يسهر على راحة شعبه وتحقيق مصالحه، ولأنه "بيخاف على البلد أكثر من عينيه".
وبدا "شعبولا" الذي اكتسب شهرة عريضة بالشارع المصري بسبب أغانيه، خاصة ذات الصبغة السياسية حريصًا على عدم دخوله منطقة الألغام السياسية، وجاءت إجاباته دبلوماسية إلى حد بعيد، وذلك لدى سؤاله عن ما يثار بشأن وجود خلافات بينه وبين وزير المالية الدكتور يوسف بطرس غالي، أو إمكانية تعاونه مع "الإخوان المسلمين".
وأبدى، ترحيبه بدخول البرلمان واستعداده لمباراة كبار السياسيين، لكنه قال إنه لا يسعى لذلك في الوقت الراهن "لأن السياسة ما بتأكلش عيش"، وإن قال إنه ليس هناك ما يمنع في قبول عرض بتعيينه عضوًا بمجلس الشورى في حال وقع اختيار الرئيس عليه، وقال إنه يفضل تولي وزارة الداخلية في حال تم تخييره لتولي حقيبة وزارية.
وفيما يلي نص حوار "المصريون" مع المطرب شعبان عبد الرحيم:
* أنت لسه زعلان من جمال مبارك علشان ما عزمكش في فرحه؟
ـ يا عمي المسامح كريم وأنا ما قدرش أزعل من جمال بيه.. أنا قلت في عقل بالي يمكن حد قاله عليّ حاجة كده ولا كده.. ولا واخد على خاطره. لكن اللي مزعلني بجد أني حضرت أغنية جديدة للفرح ورحت قبليها بأسبوع اشتريت طقم جديد يليق بمعازيم الفرح لكن مفيش نصيب وألف مبروك ليه.
* مش يمكن جمال مبارك رفض يعزمك بعدما الأمن أبلغه إنك عليك قضية؟
ـ الحمد لله يا باشا.. أنا صاغ سليم وطول عمري دوغري لا عندي قضية ولا حتى محضر حتى الضرايب بدفعها علشان محدش يعلم عليّ.
* أغنية دايمًا شباب اللي غنتها في عيد ميلاد الرئيس مبارك مش خايف الناس يقولوا عليك أنك منافق وماشي مع الرايجة؟
ـ اللي هياخذ باله من الناس مش ها يخلص ما هو ياما اتقال علىّ حواديت وبعدين في حاجة اتغيرت أديك أهو بتعمل معايا حوار.. وبعدين أنا بحب الرئيس مبارك بجد مش كلام وخلاص.. لأنه راجل جدع وحقاني ويعرف الأصول وبيخاف على مصر أكثر من عينيه.. هو عيب لما أغني للرئيس وأشاركه في عيد ميلاده.
* الأغنية كلماتها بتقول إيه؟
ـ عيد سعيد ياريس يا وش الخير والنصر.. ربنا يحميك ودايما يعلى اسم مصر.. إييييه.. وقتك ضايع في شغلك مبتحسش بالساعات.. دايما شباب وهمة وكلك نشاط.. إييييه.. علشان أنت إنسان كويس من كل الناس محبوب.. رمز السلام ياريس وبتكره الحروب.. إييييه.
* أخبار انتخابات الشورى معاك إيه؟ ماحدش طلب منك تغني له في الدعاية الانتخابية؟
ـ اللي بيكلموني كثير وكلهم بيبقوا عشمانين.. لكن أنا مش فاضي اليومين دول عندي مسرح وبصور مسلسل وفيلم.. لكن لوحد حبيبي قوي وطلب مني أقف جانبه مش هتأخر أنا برضه ابن بلد وأعرف الواجب والأصول وطلبات حبايبي أوامر.
* وأنت ما فكرتش ترشح نفسك في انتخابات الشورى؟
ـ يا عم الحج أحنا مش فاضين للسياسة ووجع الدماغ بتاعها.. لأن السياسة بحرها واسع وما بتأكلش عيش.. إحنا ورانا عيال عوزين نربيهم وبنجري ورا أي جنيه ويكون حلال.. ولكن لو الريس مبارك فكر يعيني في مجلس الشورى زي الناس اللي بيخترهم يخشوا من غير انتخابات هأوافق طبعا وهيكون اسمي عضو مجلس شوري وتكون معايا حصانة.
* لو الرئيس اختارك وعينك في مجلس الشورى هتعرف تتنافش داخل المجلس؟
ـ عليّ النعمة أجيب واحد تكون شغلته السياسة ومجلس الشورى واتقاول معاه علشان يعلمني أقول إيه واتكلم أزاي جوه المجلس.. حاكم ده مجلس الشورى واللي فيه كبرات البلد يعني لازم أكون زيهم وأعرف اتكلم وأفهم بيقولوا أيه.
*أحنا سمعنا فيه مشاكل بينك وبين يوسف بطرس غالي نائب ديرتك الكلام ده صحيح؟
ـ يانهار أبيض على الناس مش عارف بيطلعوا الإشاعات دي أزاي هم لسه فيه ناس بيعملوا أسافين وبيوقعوا الدنيا في بعض دا يوسف بيه عمنا الكبير وطول عمره صاحب واجب وأفضال علينا وعلى أهالي الشرابية فأزاي أزعل منه أو يكون فيه بيني وبينه مشاكل .
* في حد من الإخوان المسلمين كلمك علشان تسانده في الانتخابات؟
ـ ماحدش كلمني منهم وحياة أبوك بلاش تتدخلني في مشاكل معاهم وتجرجرني في ملعب مش بتاعي .
* أنت خايف ولا أيه يا شعبان ؟
ـ أنا ما بخفش من حد لكن دول ناس بتوع ربنا وممكن لو خبطت فيهم يدعوا علي دعوة يجبوني الأرض فيها.
* شعبان لو اختار يكون وزير يحب يمسك أية وزارة؟
ـ من غير ما يزعل مني حبيب بيه أنا عاوز أمسك وزارة الداخلية.
منقول من جريدة المصرييون المستقلة.

الإعلام والإعلان

لفت نظري موضوع مهم جدا وهو موضوع الإعلام والإعلان وكيفية تأثيره على المجتمع وبناء الدولة، عرفت أن روسيا أطلقت قناة فضائية ناطقة باللغة العربية، السبب في تشغيل القناة دي أن تستعيد روسيا نفوذها بمنطقة الشرق الأوسط وشمال أفريقيا كما كانت أيام الإتحاد السوفيتي. تخيلوا أن دولة بتحاول تستعيد نفوذها عن طريق الإعلام.

احنا هنا بقي كعرب بنبص للإعلام بصورة تانية خالص. كل دولة عربية عندها قناة أخبارية مثلاً بيكون أهم الأحداث عندها أنها تطلع القطط الفطصانة عند الدولة التانية وبأسلوب يصل إلي قلة الأدب أحياناً

الإنتقاد شئ طبيعي وضروري جداً فالنقد يصلح الأخطاء والعيوب للدفع الى الأمام ولكن النقد له آدابه التي يجب أن يتحلى بها الناقد حتي لا تظهر بصورة سخط وتمرد كما هو الحال ..... ويجب أن يفهم الجميع أنه إذا تم ربط أعلامي بين الدول العربية (إعلام هادف) وليس إعلام الفيديو كليب والعري الذي دمر الشباب وتعبهم وسطح أفكارهم وأصبح كل ما يفكر فيه الموديل أو نجمة الكليب بملابسها المجردة من الملابس أساساً ، لأصبح بالفعل هناك وطن عربي يعي ويفهم ما يدور من حوله ويرى الأخرون من هو الوطن العربي كوسيلة ليفهمنا الغرب الذين يعتقدون أننا لحد دلوقتي بنمشي بالجمال فالصحراء .

ليه منزرعش في عقول الشباب أن كل الوطن العربي أشقاء وأخوة بالفعل، ليه كل ما بندخل على أي منتدى بنلاقي المصري بيشتم فالسعودي والسعودي بيشتم فالسوري والسوري بيشتم فاللبناني وهكذا والعكس ، المسئلة بقيت مسئلة حرب حرب وعداوة بين الأخوة وأقدر أقولكوا أن ده برده سببه الأعلام اللي مقدرش يوصل مفهوم العروبة عند الكل

من ناحية أخرى تعالوا نيجي للإعلان العالم كله دلوقتي بقيت كل أعلاناته عبارة عن أفكار مختصرة وبسيطة مقدرش أقول اننا مبنشفش ده عندنا، لأ.. الإعلان عندنا تطور بصورة رهيبة، طيب ما برده ممكن الدول العربية تقوم بحملة تربية قومية عبر الإعلانات المرئية والمسموعة بيني وبينكم هاتكون أحسن مليون مرة وهاتوصل للكل من كتب التربية القومية فالكتب بتاعة المدارس.

أتمنى تعليككم لأنه سيساعدنا كثيراً

أوتوماتيك

نفسي في حاجات كتييير بس والله كلها بسيطة جدا جدا، نفسي نكون بني آدمين بمعني الكلمة، انا هنا عايش في سلطنة عمان، بشوف كل اللي نفسي أشوفه في بلدي مصر، بتكلم في حاجات بسيطة جداً بس تخليك تتمني ان تكون هي دي حال مصر، تعالوا نتكلم عن النضافة، عايز اقول ان البلد بتبروء، الناس كلها حاسس انهم نضاف محدش تلاقيه ماشي وفي أيده كيس شيبسي يروح راميه كده فالشارع بالرغم ان ممكن نقول انا حجتنا في مصر ان صندوق الزبالة بعيد ، هنا برده الصناديق مش قريبة بس بتلاقي اللي يروح يرمي فيها مش يرمي جنبها ولا في المكان اللي انا واقف فيه، أمال ايه الفرق بنا وبين لامؤخذة البهايم، ده الإنسان ربنا كرمه، البهايم مطرح ما بتتزنء بتعمل عالطول ( خرفان ، كلاب ، خنازير ..... ) بلاش حتي أقول قطط لأن القطط حتي عارفة المكان بتاعها اللي مسموح لها بيه انها تعمل فيه... لأ ده انا إنسان. وعايز اقول ان ده الجزء اللي عليا انا أعمله، جزء الحكومة بقي او جزء شركات التنضيف هاتلاقي العربية بتيجي فالميعاد علشان تشيل من مكان واحد مش من كل بستان شنطة زبالة، المسائل سهلة بس أحنا نعمل اللي علينا. فالأخر هتلاقي نفسك بتتكسف ترمي أي حاجة علي الأرض أوتوماتيك.

النقطة التانية تعالوا نبص كده علي المرور. العربيات كل عربية ماشية فالحارة بتاعتها ومبشوف غورز وتخميس في وسط الشارع وكلاكسات مني اللي ودان تحبها زي عندنا لأ تلاقي النس بتستخدم الكلاكس فالضرورة الضرورة القصوي. إشارة المرور أول مرة أعرف ايه هي لازمة إشارة المرور هنا، ده حتي لو الشارع فاضي والإشارة حمرة تلاقي نفسك واقف آوتوماتيك.

تعالوا بقي نبص علي ظابط المرور لو لو وده نادر طبعاً لو لقى واحد خالف ولا حاجة متعرف تلاقيه ظهر منين المهم انه بيظهر.. تعالوا نشوف بقي بيتعامل معاه أزاي، ينزل من عرابية الشرطة لو لقى واحدة معاه يقف بعيد لما ينزلوا اللي سايق اللي هو مخالف، تلاقي الظابط بيسلم عليه وبيطمن على أحواله وبيسأله أخبار العيل ايه وأخبار الشغل والصحة، تحس انه واحد آل يعني من بقيت عالته.. وبعد مايطمن عليه بكل زوق وأدب يطلب منه الرخص وبكل بساطة يحررله المخالفة وينصحة ان يخلي باله من نفسه ومن عياله. متلاقيش اللي بيرزع علي عرابيتك وكأنه عايز يدمرك انت والعربية وكأنه بينه وبينك طار.. المهم هتلاقي نفسك بتحترمه وهو يحترمك المسائل ماشية علي انك انسان وانسان محترم كمان.. صدقني هتلاقي نفسك مش هاخالف تاني برده أوتوماتيك.

تعليقك يهمني .... وللحديث بقيه

عايزين نطورها

عايزين نظبطها ونبلطها ونخيلها فلللله

حبيبكم الغالي ابو اياد